سلطة و ..."معارضة" ..تشغيل يد عاملة!!!

شاهد عيان سمع الحوار التالي فنقله الينا في  SNS على الهواء:

الأول: خبرني، مع مين عم تشتغل بها اليومين؟

الثاني: مع  جماعة المعارضة، وأنت مع مين؟

الأول: مع جماعة السلطة..

الثاني: بس شايف جماعتك عم يضربوا على أبو جنب ..

الأول: وجماعتك عم يضربوا ويشتموا  كل مين ما بيوقف جنبهم وفايتين بالحيطان !

الثاني: سيدي.. الله يوفق الجميع.. شو عم تورِّد للبلد بها الأيام؟

الأول: أجهزة صعق كهربائي وهراوات مطاطية ولوازم تهدئة

أمنية.. وأنت شو عم تورِّد؟

الثاني: بواريد وصواريخ مضادة للدروع على شوية ملبَّس لزوم الثوار..

الأول: (يأخذ نفساً من أركيلته) الحمد لله، الشغل ماشي والبلد ماشي.. وأولادك طمني عن شغلهم؟

الثاني: أسسوا شركة لشهود العيان بكل المناطق وعاملين عقود مع المحطات وجماعات حقوق البني آدمين .. والمحروسين ولادك، شو أخبارهم؟

الأول: فتحوا فروع بكل المحافظات: توابيت ومقرئين ولزوم تعازي واللذي منو..

الثاني: (يرشف قهوته بأسى) يا أخي نحنا عم نشغل عمالة بالبلد ونقلص الكثافة السكانية، بس ما في مين يقدر..

الأول: أخي أبو دياب، عمول خير وكب بالبحر، ما في شي بيضيع عند رب العالمين..

الثاني: بس يخف الشغل شوي بدي أعمل عمرة انشاء الله..

الأول: رجلي على رجلك، بس قلّي، شغلك بالمملكة رح يكون مع السلطة ولا مع المعارضة.. يعني منشان ما فوت على خطك..

الثاني: ( يسحب نفسا) ليومها منشوف..المهم ادعي لألله يديم الثورات على هالأمة .. وربي يسر

الأول: بس أنا هلأ خايف من جماعة  المعارضة  يدخلوا (بالحوار الوطني) ليضربولنا الشغل..

الثاني: علاكين،  وما بيعرفوا شو بدهم لاتخاف منهم ، أصلا هاي الأمة بعدها مختلفة من يوم وفاة رسولها الأكرم -صلى الله عليه وسلم- لليوم.... نارة ياولد ..

هامش: إذا دُفعت للإختيار بين خسارتي لبعض أصدقائي وبين خسارتي لوطني فسأتخلى عن وهم الصداقة من أجل حقيقة الوطن .